கொழும்பு போர்ட் சிட்டி (Colombo Port City) தொடர்பான விசா வழங்கல் மற்றும் வெளிநாட்டவர் கைது விவகாரங்கள் குறித்து பல்வேறு அரச நிறுவனங்கள் இணைந்து கலந்துரையாடல்களை ஆரம்பித்துள்ளதாக தகவல்கள் வெளியாகியுள்ளன.
அண்மைக்காலமாக இலங்கையில் அதிகரித்து வரும் இணையக்குற்றங்கள் (cyber crimes) தொடர்பான விசாரணைகளில், பல வெளிநாட்டு பிரஜைகள் கைது செய்யப்பட்டதைத் தொடர்ந்து இந்த கலந்துரையாடல்கள் முன்னெடுக்கப்பட்டுள்ளன.
இதில் கொழும்பு போர்ட் சிட்டி நிர்வாகம், நிதியமைச்சு, காவல்துறை மற்றும் குடிவரவு–குடியகல்வு திணைக்களம் ஆகியவை பங்கேற்றுள்ளதாக தெரிவிக்கப்படுகிறது.
கைது செய்யப்பட்ட சில வெளிநாட்டவர்கள், போர்ட் சிட்டி பொருளாதார ஆணைக்குழு சட்டத்தின் கீழ் பதிவு செய்யப்பட்ட நிறுவனங்கள் மூலம் விசாக்களைப் பெற்றிருந்ததாக நீதிமன்றங்களில் முன்வைக்கப்பட்ட தகவல்களும் கவனத்தில் கொள்ளப்பட்டுள்ளன.
மேலும், கடந்த மே 6ஆம் திகதி கடுவெல நீதவான் நீதிமன்றத்தில் நடைபெற்ற பிணை விசாரணையில், கைது செய்யப்பட்ட 37 சீனப் பிரஜைகள் தொடர்பாக அவர்களின் சட்டத்தரணி, அவர்கள் போர்ட் சிட்டியில் பதிவு செய்யப்பட்ட நிறுவனங்களின் ஊடாகவே விசா பெற்றுள்ளதாக தெரிவித்ததாகவும் கூறப்படுகிறது.
இதற்கிடையில், போர்ட் சிட்டி பகுதிக்குள் கட்டுமான பணிகள் முழுமையாக நிறைவடையாததால் சில நிறுவனங்கள் வெளிப்புற முகவரிகளில் இருந்து இயங்கி வந்ததாகவும் தகவல்கள் தெரிவிக்கின்றன.
விசா வழங்கும் இறுதி அதிகாரம் குடிவரவு–குடியகல்வு திணைக்களத்துக்கே இருப்பதாகவும், போர்ட் சிட்டி ஆணைக்குழு பரிந்துரைகளை மட்டுமே வழங்குவதாகவும் விளக்கம் அளிக்கப்பட்டுள்ளது.
அண்மைக்காலத்தில் சீனா, மியன்மார், வியட்நாம், கம்போடியா, தாய்லாந்து, தைவான், நேபாளம், மலேசியா, மடகாஸ்கர், பிலிப்பைன்ஸ் மற்றும் இந்தியா உள்ளிட்ட பல நாடுகளைச் சேர்ந்தவர்கள் இணையக்குற்ற சந்தேகத்தில் கைது செய்யப்பட்டுள்ளதாகவும் தெரிவிக்கப்படுகிறது.
அத்துடன், கொழும்பு 2 பகுதியில் சீன மற்றும் ஸ்பானிஷ் மொழிகளுக்கிடையிலான மொழிபெயர்ப்பாளராக பணியாற்றிய பெரு நாட்டுப் பிரஜை ஒருவரும் கைது செய்யப்பட்டுள்ளதாகவும் தகவல்கள் வெளியாகியுள்ளன.
இந்த சூழ்நிலையில், போர்ட் சிட்டி வழியாக வெளிநாட்டவர்களுக்கு வழங்கப்படும் விசா நடைமுறைகள் மற்றும் பாதுகாப்பு சோதனைகள் குறித்து அரச நிறுவனங்கள் மீளாய்வு செய்யும் நிலை உருவாகியுள்ளதாக தெரிவிக்கப்படுகிறது