போக்குவரத்து சேவைகளுக்கு இடையூறு விளைவித்தால் கடும் நடவடிக்கை

இலங்கையில் பொதுப் போக்குவரத்து சேவைகளுக்கு இடையூறு விளைவிக்கும் நபர்களுக்கு எதிராக சட்டத்தை கடுமையாக அமுல்படுத்த அரசாங்கம் தீர்மானித்துள்ளது.

இந்த தீர்மானம் போக்குவரத்து, நெடுஞ்சாலைகள், துறைமுகங்கள் மற்றும் சிவில் விமானப் போக்குவரத்து அமைச்சினால் எடுக்கப்பட்டுள்ளது.அத்தியாவசிய போக்குவரத்து சேவைகளை பாதிக்க யாருக்கும் அனுமதி வழங்கப்படாது என்று பிரதி அமைச்சர் பிரசன்ன குணசேன அறிவித்துள்ளார்.

கடந்த 24 ஆம் திகதி காலி-மாத்தறை பேருந்து சாரதி மீது தாக்குதல் நடத்தப்பட்ட சம்பவம் இந்த கடுமையான நடவடிக்கைக்கான முக்கிய காரணமாக கருதப்படுகிறது.இந்த தாக்குதலை லாரி சாரதி, முச்சக்கர வண்டி சாரதி மற்றும் அவர்களுக்கு ஆதரவளித்தவர்கள் மேற்கொண்டதாக தெரிந்துள்ளது.இந்த சந்தேகநபர்கள் அனைவரும் கைது செய்யப்பட்டு, எதிர்காலத்தில் நீதிமன்றத்தில் ஆஜர்படுத்தப்படும் என்று அமைச்சர் உறுதி செய்துள்ளார்.

பொதுப் போக்குவரத்து சேவைகளை பாதிக்கும் எந்த செயல்களும் எதிர்காலத்தில் அனுமதிக்கப்படமாட்டாது.இதுபோன்ற சம்பவங்களில் ஈடுபடுபவர்கள் மீது கடுமையான சட்ட நடவடிக்கைகள் எடுக்கப்படும்.போக்குவரத்து சேவைகளின் பாதுகாப்பை உறுதிப்படுத்த, பாதுகாப்பு அமைப்புகளின் கண்காணிப்பு அதிகரிக்கப்படும்.

அரசாங்கத்தின் இந்த புதிய நடவடிக்கைகள், பொதுமக்கள் மற்றும் போக்குவரத்து ஊழியர்களின் பாதுகாப்பை உறுதி செய்யும் நோக்கத்துடன் எடுக்கப்பட்டுள்ளன என்று தெரிவிக்கப்பட்டுள்ளது.