ஹங்வெல்ல பகுதியில் இடம்பெற்ற துப்பாக்கி சூட்டு சம்பவத்தில் ஒருவர் காயமடைந்துள்ளார்.

ஹங்வெல்ல பகுதியில் இடம்பெற்ற துப்பாக்கி சூட்டு சம்பவத்தில் ஒருவர் காயமடைந்துள்ளார். ஹங்வெல்ல பகத்கம பகுதியில் மோட்டார் சைக்கிளில் வந்த அடையாளம் தெரியாத நபர்கள் அங்குள்ள வீடொன்றிற்குள் நுழைந்து இளைஞர் ஒருவரை தேடியுள்ளதாகவும் அங்கு அவர் இல்லாதததையடுத்து குறித்த இளைஞனின் தந்தை மீது துப்பாக்கி சூடு நடத்திவிட்டு தப்பிச்சென்றுள்ளதாகவும் பொலிஸ் ஊடகப்பேச்சாளர் எப் யு வுட்லர் தெரிவித்துள்ளார்.

துப்பாக்கி சூட்டில் குறித்த நபரின் தந்தையின் காலில் காயம் ஏற்பட்டுள்ள நிலையில் சிகிச்சைகளுக்காக அவிசாவலை வைத்தியசாலையில் அனுமதிக்கப்பட்டுள்ளார்.

துபாயில் தலைமறைவாக உள்ள பாதாள உலக கும்பலைச் சேர்ந்த போதைப்பொருள் கடத்தல்காரரான லலித்கன்னங்கரவின் நெருங்கிய உதவியாளராக செயற்பட்ட நபர் ஒருவரின் தந்தையே இந்த துப்பாக்கி சூட்டு சம்பவத்தில் காயமடைந்துள்ளதாக தெரிவிக்கப்பட்டுள்ளது.

இதனிடையே மீகொட மகவத்த பகுதியில் நேற்று இரவு துப்பாக்கி சூட்டு சம்பவம் ஒன்று இடம்பெற்றுள்ளதாக பொலிஸார் தெரிவித்துள்ளனர்.

மீகொட, மகவத்த முதுஹேனவத்த பகுதியில் உள்ள வீடொன்றின் முன்பாக வானத்தை நோக்கி துப்பாக்கி சூடு நடாத்தப்பட்டுள்ளதாக தெரியவந்துள்ளது.

மோட்டார் சைக்களில் வருகைதந்த அடையாளந்தெரியாத நபர்களினால் இந்த துப்பாக்கி சூடு நடாத்தப்பட்டுள்ளது.

9 மில்லமீற்றர் ரக துப்பாக்கியை பயன்படுத்தி தாக்குதல் நடத்தப்பட்டுள்ளதுடன் துப்பாக்கி சூட்டில் எவருக்கும் காயம் ஏற்படவில்லை எனவும் பொலிஸார் தெரிவித்துள்ளமை குறிப்பிடத்தக்கது.