வெளிவிவகார அமைச்சர் பேராசிரியர் ஜி.எல். பீரிஸ், நேற்றையதினம் கொழும்பில் உள்ள ஐ.நா வதிவிட ஒருங்கிணைப்பாளர் ஹனா சிங்கர்-ஹம்டியை (Hanaa Singer- Hamdy) சந்தித்துள்ளார்.
இதன்போது நாட்டின் தற்போதைய பொருளாதார சூழ்நிலையில் அத்தியாவசியப் பொருட்களின் விநியோகம், உணவு தொடர்பான கவலைகள் போன்ற பல பாதிப்புகள் குறித்து கலந்துரையாடப்பட்டதாக தெரிவிக்கப்படுகின்றது.
எதிர்வரும் காலங்களில் ஏற்படக்கூடிய சிரமங்களை அரசாங்கம் முன்னறிவித்துள்ளதாகவும், பாதிப்பைக் குறைக்க முன்னெச்சரிக்கை நடவடிக்கைகளை மேற்கொண்டு வருவதாகவும் அமைச்சர், சந்திப்பில் கோடிட்டுக் காட்டினார்.
அதோடு சர்வதேச நாணய நிதியம் மற்றும் உலக வங்கியுடன் நடைபெற்று வரும் பேச்சுவார்த்தைகள் உட்பட, நாட்டில் அரசியல் மற்றும் பொருளாதார ஸ்திரத்தன்மையை உறுதிப்படுத்த அரசாங்கம் எடுத்த நடவடிக்கைகளை வெளியுறவு அமைச்சர் விளக்கினார்.
மக்களின் அவசரத் தேவைகளை நிவர்த்தி செய்வதற்காக முக்கிய அரச நிறுவனங்கள் மற்றும் ஐ.நா மற்றும் நன்கொடை நாடுகளின் பங்களிப்புடன் கூடிய மத்திய பொறிமுறையொன்று பரிசீலனையில் உள்ளதாக அமைச்சர் பேராசிரியர் பீரிஸ் தெரிவித்தார்.
இருதரப்பு பங்காளிகளுடன் கலந்தாலோசித்து, அத்தியாவசியப் பொருட்களின் பற்றாக்குறை மற்றும் விவசாயத் துறை எதிர்கொள்ளும் பிரச்சினைகளை நிவர்த்தி செய்ய அரசாங்கம் எடுத்த நடவடிக்கைகள் குறித்தும் அவர் விளக்கினார்.
ஐ.நா வதிவிட ஒருங்கிணைப்பாளர் வெளிவிவகார அமைச்சர் பேராசிரியர் பீரிஸுக்கு சர்வதேச உதவிகளைப் பெறுவதற்கும், அத்தியாவசியப் பொருட்களின் பற்றாக்குறையை நிவர்த்தி செய்வதற்கும் மற்றும் வேலையின்மை மற்றும் ஊட்டச்சத்து குறைபாடு போன்ற பிரச்சினைகள் தொடர்பான கவலைகளை நிவர்த்தி செய்வதற்கும் அரசாங்கத்திற்கு ஐ.நாவின் முழு ஆதரவு கிடைக்குமெனவும் உறுதியளித்தார்.
இது தொடர்பில் ஐ.நா பலதரப்பு முறையீடுகளை மேற்கொள்ளவுள்ளதாக வதிவிட இணைப்பாளர் (Hanaa Singer- Hamdy) குறிப்பிட்டுள்ளார்.
மேலும் வெளிவிவகார அமைச்சர் பேராசிரியர் பீரிஸுக்கு ஈடுபாடுகள் மற்றும் விளக்கங்களுக்கு நன்றி தெரிவித்த அவர் (Hanaa Singer- Hamdy) , இலங்கை அரசாங்கத்துடன் ஐ.நா தனது ஒத்துழைப்பைத் தொடரும் என்றும் உறுதியளித்ததாக தெரிவிக்கப்படுகின்றது.
